ካይሮ ግብጽ በኦርቶዶክስ ቤተ ክርስቲያን ቅጥር ግቢ የቦምብ ፍንዳታ ጉዳት ደረሰ

ካይሮ ግብጽ  በኦርቶዶክስ ቤተ ክርስቲያን ቅጥር ግቢ የቦምብ ፍንዳታ ጉዳት ደረሰ

coptic-church-egypt

በግብጽ – ካይሮ ቅዱስ ማርቆስ ካቴድራል በሚገኘው የቅዱስ ጴጥሮስ ወጳውሎስ ቤተ ክርስቲያን ውስጥ፣ ዛሬ ረፋድ ላይ የነጐደ ቦምብ፣ በጸሎተ ቅዳሴ ላይ ከነበሩት ምእመናን ቢያንስ 25ቱን ገድሎ ከ49 ያላነሱትን ማቁሰሉን የአገሪቱ የጤና ጥበቃ ሚኒስቴር ገለጸ፡፡

ጥቃቱ የተፈጸመው፣ የኮፕት ኦርቶዶክስ መንበረ ፓትርያርክ ከኾነው የቅዱስ ማርቆስ ካቴድራል ጋር ኩታ ገጠም ኾኖ በአንድ ቅጽር በሚገኘው በዚኹ ቤተ ክርስቲያን የሴቶች ምእመናን በሚቆሙበት አንቀጽ እንደኾነ፣ የቤተ ክርስቲያኒቱ ቃል አቀባይ ቀሲስ ፖል ሐሊም ተናግረዋል፡፡

በቤተ ክርስቲያኑ የኋላ መቀመጫ በሴት ቦርሳ ውስጥ እንዳለ ረፋድ አራት ሰዓት ላይ የፈነዳው ቲ.ኤን.ቲ ቦምብ፣ 12 ኪሎ ግራም እንደሚመዝን ተጠቅሷል፡፡ ምእመናኑ በእሑድ ሰንበት ጸሎተ ቅዳሴ ላይ እንደነበሩና ቁስለኞች ወደተለያዩ የከተማይቱ ሆስፒታሎች መወሰዳቸውን የአገሪቱ የጸጥታ አካላት አመልክተዋል፡፡

በአገሪቱ የብዙኃን መገናኛዎች እየተላለፉ ያሉ የቪዲዮ ምስሎች፣ በአደጋው የወደሙና የተሰባበሩ መስኮቶች፣ ወንበሮችና የጣሪያው ውስጠኛ አካል፤ በደም ከተለወሱት የሟቾችና የተጎጅዎች አልባሳት ጋር በቤተ ክርስቲያኑ ወለል ላይ እንደተበታተኑና እንደተመሰቃቀሉ ያሳያሉ፡፡

ከአንገቷ በላይ ያለው አካሏ የተቆረጠ አንዲት ሴት ከቦታው ስትገለል መመልከቷን ለአሶሽየትድ ፕረስ የዜና ወኪል የተናገረች የዓይን እማኝ፤ የሚበዙት የጥቃቱ ሰለባዎች ሕፃናትና ሴቶች እንደኾኑ ተናግራለች፤ “ሕፃናት ልጆችም ነበሩ፤ ምን በበደሉ ይኼ ይደረግባቸዋል፤ ይኼን ዓይነቱን ጭካኔ ከማይ ምነው ሞቴን ከእነርሱ ጋር ባደረገው!” ስትልም የኹኔታውን አሠቃቂነት ትገልጻለች፡፡

በጥቃቱ የተመረሩ የኮፕት ክርስቲያኖችና ሙስሊም ወገኖች፣ ቀትር ላይ በካቴድራሉ በመሰብሰብ ቁጣቸውንና ተቃዋሟቸውን በአንድነት አሰምተዋል፤ የአባስያ ጎዳናን ጨምሮ ወደ ካቴድራሉ የሚወስዱ መንገዶች በሙሉ በጸጥታ ኃይሎች ታግረው አካባቢው ጥብቅ ፍተሻ እየተደረገበት እንደኾነም ተዘግቧል፡፡

ቅዱስ ጴጥሮስ ወጳውሎስ ቤተ ክርስቲያን ውስጥ የተፈጸመው የዛሬው ጥቃት፤ እ.አ.አ በ2013፣ በካቴድራሉ አቅራቢያ በሐዘን ላይ ከነበሩ ምእመናን ኹለቱ ከተገደሉበት ፍንዳታ በኋላ የደረሰና በዚኹ ሳምንት በተለያዩ ቦታዎች ከታዩት ተከታታይ አደጋዎች ሦስተኛው ነው፡፡

የቦምብ ጥቃቱን የኰነኑት የግብጹ ፕሬዝዳንት አብዱል ፈታሕ አል-ሲሲ፣ ሰለባዎቹ የሚታሰቡበት የሦስት ቀናት ብሔራዊ ሐዘን ዐውጀዋል፤ የአደጋው ጠንሳሾች፣ አድራሾችና ተባባሪዎች የእጃቸውን እንደሚያገኙ መናገራቸውንም የአገሪቱ ቴሌቭዥን አስታውቋል፡፡

በአገሪቱ የኮፕት ክርስቲያኖች እና ሙስሊሞች የአሠቃቂ ሽብር ዒላማ በመኾን ላይ እንዳሉ ፕሬዝዳንቱ ገልጸው፤ ግብጽ፣ ከኹኔታው አንድነቷን አጽንታና የበለጠ ተጠናክራ ትወጣለች፤ ማለታቸው ተዘግቧል፡፡

በኮፕት ኦርቶዶክስ ቤተ ክርስቲያን መንበረ ማርቆስ ሐዋርያዊ የአሌክሳንደርያ ፖፕና የመላው አፍሪቃ ፓትርያርክ ብፁዕ ወቅዱስ አቡነ ታዎድሮስ፣ በግሪክ ሲያካሒዱ የቆዩትን ጉብኝት በማጠናቀቅ ወደ ካይሮ በመመለስ ላይ እንዳሉ የቤተ ክርስቲያኒቱን ምንጮች ጠቅሶ የዘገበው እንደ ደረሱ በቀጥታ ጥቃቱ ወደተፈጸመበት ስፍራ እንደሚያመሩ ጠቁሟል፡፡

ለዛሬው ጥቃት እስከ አኹን ሓላፊነቱን በይፋ የወሰደ አካል ባይኖርም፣ ከአጠቃላዩ ሕዝብ 10 በመቶ(ከ10 እስከ 14 ሚሊዮን) ያኽል የሚኾኑት ኦርቶዶክሳውያን ክርስቲያኖች፣ በሰበብ አስባቡ ከሚፈጸምባቸው ሥርዓታዊ መድልዎ ባሻገር ያሉበትን ሠቆቃ የሚያሳይ ነው፤ ተብሏል፡፡

Advertisements

Author: mr☻n Ta Αβραάμ

Long live Ethiopia “When dictatorship is a fact, revolution becomes a right." victor Hugo

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s